गारांच्या तडाख्यात जळकोटचा शेतकरी; जगण्याचा प्रश्न ऐरणीवर

 जळकोट /रमेश कलशेट्टी -जळकोट परिसरावर कोसळलेल्या गारांसह अवकाळी पावसाने शेतकऱ्यांच्या आयुष्यावर अक्षरशः घाव घातला आहे. कष्टाने जोपासलेली पिके एका रात्रीत उद्ध्वस्त झाली असून शेतकऱ्यांची स्वप्ने चक्काचूर झाली आहेत. डोळ्यांसमोर उभे केलेले हिरवेगार शेत एका क्षणात उजाड झाले, आणि हातातोंडाशी आलेला घास निसर्गाने हिरावून घेतला.

आंबा, द्राक्ष यांसारख्या फळबागांचे मोठ्या प्रमाणावर नुकसान झाले आहे. फुलोऱ्यावर आलेली फळे गारांच्या तडाख्याने जमिनीवर कोसळली. रब्बी हंगामातील ज्वारीचे पीक आडवे पडले असून शेतातील कडबा व चारा पूर्णपणे भिजून निकामी झाला आहे. त्यामुळे जनावरांच्या चाऱ्याचा प्रश्नही गंभीर बनला आहे.

गारांच्या माऱ्याने झाडांची पाने गळून पडली, तसेच शेतकऱ्यांच्या आशाही कोमेजून गेल्या आहेत. आधीच कर्जाच्या ओझ्याखाली दबलेला शेतकरी या नव्या संकटाने पूर्णपणे खचून गेला आहे. त्याच्या डोळ्यांतून ओघळणारे अश्रू हीच या परिस्थितीची साक्ष देत आहेत.

नववर्षाच्या उंबरठ्यावर आनंद आणि भरघोस उत्पादनाची अपेक्षा असताना निसर्गाच्या कोपाने दु:खाचे सावट पसरले आहे. प्रत्येक शेतात हतबलतेचे चित्र दिसत असून प्रत्येक चेहऱ्यावर चिंता स्पष्ट जाणवत आहे.

या भीषण संकटातून बाहेर पडण्यासाठी शासनाने तातडीने पावले उचलणे गरजेचे आहे. पंचनामे त्वरीत करून नुकसानग्रस्त शेतकऱ्यांना योग्य व तात्काळ भरपाई देणे अत्यावश्यक आहे. प्रशासनाने घटनास्थळी भेट देऊन वस्तुस्थितीचा आढावा घ्यावा आणि शेतकऱ्यांना त्वरित दिलासा द्यावा.

फक्त आश्वासनांनी आता उपयोग होणार नाही, तर ठोस आणि प्रभावी मदतीची गरज आहे. कारण शेतकरी वाचला तरच शेती वाचेल, आणि शेती वाचली तरच देशाचा कणा मजबूत राहील.